The Bruce
To meyt thair fayis that spred war wyd.
Tharfor, endlang the louch his syd,
Sa besyly thai socht, and fast, 415
Tyll Jamys of Dowglas, at the last,
Fand a litill sonkyn bate,
And to the land it drew, fut-hate.
But it sa litill wes that it
Mycht our the wattir bot thresum flyt. 420
Thai send thar-off word to the King,
That wes joyfull off that fynding;
And fyrst in-to the bate is gane,
With him Dowglas; the thrid wes ane
That rowyt thaim our deliverly, 425
And set thaim on the land all dry:
And rowyt sa oft-sys to and fra,
Fechand ay our twa and twa,
That in a nycht and in a day,
Cummyn owt-our the louch ar thai. 430
For sum off thaim couth swome full weill,
And on his bak ber a fardele.
Swa with swymmyng, and with rowyng,
Thai brocht thaim our, and all thair thing.
[Sidenote: 1306] _Bruce reads aloud a Romance_]
The King, the quhilis, meryly 435
Red to thaim, that war him by,
Romanys off worthi Ferambrace,
That worthily our-cummyn was,
Throw the rycht douchty Olyver;
And how the Duk-Peris wer 440
Assegyt in-till Egrymor,
Quhar King Lavyne lay thaim befor,
With may thowsandis then I can say.
And bot eleven within war thai,
And a woman: and war sa stad, 445
That thai na mete thar-within had,
Bot as thai fra thar fayis wan.
Yheyte sua contenyt thai thaim than,
That thai the tour held manlily,
Till that Rychard off Normandy, 450
Magre his fayis, warnyt the King,
That wes joyfull off this tithing:
For he wend thai had all bene slayne.
Tharfor he turnyt in hy agayne,
And wan Mantrybill and passit Flagot; 455
And syne Lavyne and all his flot,
Dispitusly discumfyt he:
And deliveryt his men all fre,
And wan the naylis, and the sper,
And the croune that Jesu couth ber; 460
And off the croice a gret party
He wan throw his chevalry.
The gud King, apon this maner,
Comfortyt thaim that war him ner;
And maid thaim gamyn and solace, 465
Till that his folk all passyt was.
[465: E has again _et_, as in I., 309.]
Quhen thai war passit the watir brad,
Suppos thai fele off fayis had,
Thai maid thaim mery, and war blyth;
Nocht-for-thi full fele syth 470
Thai had full gret defaut off mete,
And tharfor venesoun to get
In twa partys ar thai gayne.
The King him-selff was in-till ane,
And Schir James off Dowglas 475
In-to the tothir party was.
Then to the hycht thai held thar way,
And huntyt lang quhill off the day;
And soucht schawys, and setis set;
Bot thai gat litill for till ete. 480
Then hapnyt at that tyme percas,
That the Erle of the Levenax was
Amang the hillis ner tharby;
And quhen he hard sa blaw and cry,
He had wondir quhat it mycht be; 485
And on sic maner spyryt he,
That he knew that it wes the King
And then, for-owtyn mar duelling,
With all thaim off his company,
He went rycht till the King in hy, 490
Sa blyth and sa joyfull, that he
Mycht on na maner blyther be.
For he the King wend had bene ded;
And he wes alsua will off red,
That he durst rest in-to na place 495
Na, sen the King discumfyt was
At Meffan, he herd nevir thing
That evir wes certane off the King.
Tharfor in-to full gret daynte,
The King full humyly haylsit he; 500
And he him welcummyt rycht blythly,
And kyssyt him full tendirly.
And all the lordis, that war thar,
Rycht joyfull off thar meting war,
And kyssyt him in gret daynte. 505
It wes gret pite for till se
How thai for joy and pite gret,
Quhen that thai with thar falow met,
That thai wend had bene dede; forthi
Thai welcummyt him mar hartfully. 510
And he for pite gret agayne,
That nevir off metyng wes say fayne.
[495: E reads _nocht rest_.]
[502: E has _askyt_. H _kyssyt_.]
[508: H has _fellowes_, whence _falowis_ (S).]
[Sidenote: 1306] _How men weep_]
Thocht I say that thai gret, sothly
It wes na greting propyrly:
For I trow traistly that gretyng 515
Cummys to men for mysliking;
And that nane may but anger gret,
Bot it be wemen, that can wet
Thair chekys quhen-evir thaim list with teris,
The-quhethir weill oft thaim na thing deris. 520
Bot I wate richt weill, but lesyng,
Quhat-evir men say off sic greting,
That mekill joy, or yheit pete,
May ger men sua amovyt be,
That watir fra the hart will rys, 525
And weyt the eyne on sic avys,
That it is lik to be greting,
Thocht it to be nocht sua in all thing.
For quhen men gretis enkrely,
The hart is sorowfull or angry. 530
Bot for pite, I trow, gretyng
Be na thing bot ane opynnyng
Off hart, that schawis the tendirnys
Off rewth that in it closyt is.
The barownys apon this maner, 535
Throw Goddis grace, assemblyt wer.
The Erle had mete, and that plente,
And with glaid hart it thaim gaiff he;
And thai eyt it with full gud will,
That soucht nane othir sals thar-till 540
Bot appetyt, that oft men takys;
For rycht weill scowryt war thar stomakys.
Thai eit and drank sic as thai had;
And till our Lord syne lovyng maid,
And thankit him, with full gud cher, 545
That thai war met on that maner.
The King then at thaim speryt yharne,
How thai, sen he thaim saw, had farne;
And thai full petwysly gan tell
Aventuris that thaim befell, 550
And gret anoyis, and poverte.
The King thar-at had gret pite:
And tauld thaim petwisly agayne
The noy, the travaill, and the payne,
That he had tholyt, sen he thaim saw. 555
Wes nane amang thaim, hey na law,
That he ne had pite and plesaunce,
Quhen that he herd mak remembrance
Off the perellys that passyt war.
For, quhen men oucht at liking ar, 560
To tell off paynys passyt by
Plesys to heryng wonderly;
And to rehers thar auld disese,
Dois thaim oft-sys confort and ese;
With-thi thar-to folow na blame, 565
Dishonour, wikytnes, na shame.
[521: H gives _right_, which seems necessary for the metre. E and S
omit.]
How the King passed to the Sea, and how the Earl of Lennox was chased.
[Sidenote: 1306] _The Knights at the Oars_]
Eftir the mete sone rais the King,
Quhen he had levyt hys speryng;
And buskyt him, with his mengyhe,
And went in hy towart the se; 570
Quhar Schir Nele Cambell thaim mete,
Bath with schippis, and with meyte;
Saylys, ayris, and othir thing,
That wes spedfull to thar passyng.
Then schippyt thai, for-owtyn mar; 575
Sum went till ster, and sum till ar,
And rowyt be the ile of But.
Men mycht se mony frely fute
About the costis thar lukand,
As thai on ayris rais rowand: 580
And nevys that stalwart war and squar,
That wont to spayn gret speris war,
Swa spaynyt aris, that men mycht se
Full oft the hyde leve on the tre.
For all war doand, knycht and knave; 585
Wes nane that evir disport mycht have
Fra steryng, and fra rowyng,
To furthyr thaim off thar fleting.
Here the Earl of Lennox is followed by Traitors.
Bot in the samyn tyme at thai
War in schipping, as yhe hard me say, 590
The Erle off the Levenax was,
I can nocht tell yhow throw quhat cas.
Levyt behynd with his galay,
Till the King wes fer on his way.
Quhen that thai off his cuntre 595
Wyst that so duelt behynd wes he,
Be se with schippys thai him soucht;
And he that saw that he wes nocht
Off pith to fecht with thai traytouris,
And that he had na ner socouris 600
Then the Kingis flote, for-thi
He sped him eftir thaim in hy.
Bot the tratouris hym folowyt sua,
That thai weill ner hym gan our-ta.
For all the mycht that he mycht do, 605
Ay ner and ner thai come him to.
And quhen he saw thai war sa ner
That he mycht weill thar manauce her,
And saw thaim ner and ner cum ay,
Then till his mengyhe gan he say; 610
“Bot giff we fynd sum sutelte,
“Ourtane all sone sall we be.
“Tharfor I rede, but mar letting,
“That, owtakyn our armyng,
“We kast our thing all in the se: 615
“And fra our schip swa lychtyt be,
“We sall swa row, and speid us sua,
“That we sall weill eschaip thaim fra;
“With that thai sall mak duelling
“Apon the se, to tak our thing; 620
“And we sall row but resting ay,
“Till we eschapyt be away.”
As he devisyt thai have done;
And thar schip thai lychtyt sone:
And rowyt syne, with all thar mycht; 625
And scho, that swa wes maid lycht,
Raykyt slidand throw the se.
And quhen thar fayis gan thaim se
Forowth thaim alwayis, mar and mar,
The thingis that thar fletand war 630
Thai tuk; and turnyt syne agayne,
Swa that thai lesyt all thar payne.
Quhen that the Erle on this maner,
And hys mengyhe, eschapyt wer,
Eftyr the King he gan hym hy, 635
That then, with all his cumpany,
In-to Kyntyr aryvyt was.
The Erle tauld him all his cas;
How he wes chasyt on the se,
With thaim that suld his awyn be; 640
And how he had bene tane but dout,
Na war it that he warpyt owt
All that he had, him lycht to ma;
And swa eschapyt he thaim fra.
“Schyr Erle,” said the King, “perfay 645
“Syn thow eschapyt is away,
“Off the tynsell is na plenyheing.
“Bot I will say the weile a thing;
“That thar will fall the gret foly
“To pas oft fra my cumpany. 650
“For fele sys, quhen thow art away,
“Thow art set in-till hard assay.
“Tharfor me thynk it best to the
“To hald the alwayis ner by me.”
‘Schyr,’ said the Erle, ‘it sall be swa. 655
‘I sall na wys pas fer yhow fra,
‘Till God giff grace we be of mycht
‘Agayne our fayis to hald our stycht.’
[647: _The_ is in E. S reads _thi_ from H.]
[658: J reads _flycht_ from E, but the two first letters are not
clear, and S prefers _stycht_, though an unusual word.]
[Sidenote: 1306] _Angus of Islay joins Bruce_]
Angus off Ile that tyme wes syr,
And lord and ledar off Kyntyr. 660
The King rycht weill resavyt he;
And undretuk his man to be:
And him and his, on mony wys,
He abandownyt till his service.
And, for mar sekyrnes, gaiff him syne 665
Hys castell off Donavardyne,
To duell tharin at his liking.
Full gretumly thankyt him the King,
And resavyt his service.
Nocht-for-thi, on mony wys, 670
He wes dredand for tresoun ay:
And tharfor, as Ik hard men say,
He traistyt in nane sekyrly,
Till that he knew him utraly.
Bot quhatkyn dred that evir he had, 675
Fayr contenance to thaim he maid.
And in Donavardyne dayis thre,
For-owtyne mar, then duellyt he.